Украинскиот претседател Володимир Зеленски побара од американскиот претседател Доналд Трамп да ја посети неговата земја и да биде сведок на трагедијата на актуелната војна пред да се посвети на какви било наводни мировни решенија со Русија.
Свесен за непријатната средба со американскиот лидер во Вашингтон во февруари, Зеленски ја повтори својата почит кон позицијата на САД.
„Но, ве молам, пред какви било одлуки, каков било облик на преговори, дојдете и видете ги луѓето, цивилите, воините, болниците, црквите, ранетите или мртвите деца“, изјави Зеленски за американската телевизија Си-Би-Ес во интервју објавено синоќа.
Зеленски до Трамп: Дојди во Украина и ќе разбереш што направи Путин
Се надевам дека Трамп тогаш ќе разбере со што си има работа, рече тој.
„Ќе разберете што направи (рускиот претседател Владимир) Путин.“
CBS сними интервју со Зеленски за време на посетата на неговиот роден град Криви Рих. Таму во руски ракетен напад на 4 април загинаа 19 лица, меѓу кои 9 деца и еден тинејџер.
Во неделата, најмалку 34 лица загинаа во ракетен напад врз украинскиот град Суми.
Зеленски рече дека, според него, рускиот поглед на војната, која трае повеќе од три години, преовладувал во новата американска администрација.
Тој беше особено критичен кон потпретседателот Џеј-Ди Венс, кој го предводеше нападот врз Зеленски за време на неговата посета на Белата куќа на крајот на февруари.
„Се обидов да објаснам дека не можете да барате нешто на средина, има агресор и има жртва“, рече Зеленски.