Започнаа градежните работи за приклучување на спортската сала во Куманово на дистрибутивната гасоводна мрежа, информираше градоначалникот Максим Димитриевски.
Како што објави на социјалните мрежи, екипите на ЈП „Куманово-гас“ веќе работат на изградба на подземната инсталација за приклучување на објектот на природен гас.
– Екипите на Јавното претпријатие „Куманово-гас“ интензивно работат на прекоп и изградба на подземна инсталација за приклучување на спортската сала на природен гас, напиша Димитриевски.
Паралелно со изградбата на гасоводниот приклучок, се изведуваат и работите за новиот систем за греење и вентилација во спортската сала.
„Паралелно се врши и изградба на системот за греење и вентилација во спортската сала“, наведува градоначалникот.
Димитриевски додава дека Општината продолжува со проширување на гасоводната инфраструктура во градот.
Инаку, директорот на ЈП „Куманово-гас“, Марко Митровски, неодамна информираше дека проектната документација за приклучување на спортската сала е целосно завршена и дека по добивањето на потребните одобренија веднаш ќе започнат градежните активности, со цел објектот да биде приклучен на природен гас.
Покрај спортската сала, ЈП „Куманово-гас“ годинава работи и на нови приклучоци и проширување на дистрибутивната гасоводна мрежа.
Во план е приклучување на повеќе јавни установи, меѓу кои Здравствениот дом Куманово, основните училишта „Наим Фрашери“ и „Вук Караџиќ“, како и градинката „Славејче“, а се реализираат и проекти за изградба на нови делници од гасоводната мрежа во повеќе делови од градот.
Никола Ивановски