Способностите на новите модели на вештачка интелигенција ќе ја надминат човечката интелигенција до крајот на следната година, сè додека снабдувањето со електрична енергија и хардвер може да ги задоволи барањата на сè помоќната технологија, според Илон Маск.
– Претпоставувам дека ќе имаме вештачка интелигенција која е попаметна од кој било човек, веројатно на крајот на следната година – изјави претприемачот и милијардер, кој раководи со „Tesla“, „X“ и „SpaceX“.
Во следните пет години, можностите на вештачката интелигенција веројатно ќе ги надминат можностите на сите луѓе, предвиде Маск за време на разговорот со Николај Танген, извршен директор на инвестициската банка Норгес.
Маск, пишува „Фајненшл тајмс“, е постојан оптимист за развојот на таканаречената вештачка општа интелигенција (AGI), алатки за вештачка интелигенција толку моќни што можат да ги надминат најспособните поединци во кој било домен.
Сепак, овие коментари се чекор напред, според медиумите.
Минатата година Маск предвиде дека „целосниот“ AGI ќе биде постигнат до 2029 година.
Некои од најхрабрите предвидувања на Маск, како што се автомобилите без возач и ракетата што ќе слета на Марс, допрва треба да се остварат.
Голем број откритија на вештачката интелигенција во изминатите 18 месеци, вклучително и лансирањето на алатки за генерирање видео и чет-ботови, ја турнаа границата на вештачката интелигенција напред побрзо од очекуваното.
Демис Хасабис, ко-основачот на DeepMind на Google, претходно оваа година предвиде дека AGI може да се постигне до 2030 година.
Темпото на развој е забавено поради тесно грло во снабдувањето со микрочипови, особено оние произведени од Nvidia, кои се неопходни за обука и управување со модели со вештачка интелигенција.
Тие ограничувања сега се олабавуваат, вели Маск, но новите модели сега го тестираат снабдувањето со други компоненти на мрежата.
– Минатата година (набавката) беше ограничена на чипови… Луѓето не можеа да набават доволно чипови Nvidia. Оваа година се префрламе на напојување на напонски трансформатори. За година-две (ограничувањето ќе биде) само снабдување со струја – рече тој.
Желбата на Маск да се приклучи на трката за вештачка интелигенција е во спротивност со ставот што го зазеде минатата година кога предупреди на „длабоки ризици за општеството и човештвото“ што ги носат супермоќните алатки за вештачка интелигенција и повика на пауза во развојот на напредната вештачка интелигенција.