Венецуелските власти ја вратија контролата над најпознатиот затвор во Венецуела, Токорон, кој беше целосно под контрола на криминалци.
Околу 11.000 полицајци и десетици оклопни возила беа распоредени надвор од затворот и беа ангажирани да ја вратат контролата врз затворот Токорон.
Затворот сега е целосно испразнет, а околу 2.500 затвореници се префрлени во други затвори.
Затворот беше контролиран од бандата Трен де Арагуа, која ги рашири своите пипала низ Венецуела и најмалку осум други земји од Латинска Америка.
Според истрагата на венецуелската новинарка Рона Рискез, полицијата до сега била надвор, а затворската управа била во рацете на банда која изнудувала затвореници, но нудела необични услуги, со базен, зоолошка градина, обложувалници, сали и спортски полиња.
Во соопштението за печатот, владата на Венецуела ја поздрави успешната операција и апсолутната контрола на затворот Токорон.
Полицијата упаднала во затворот околу седум часот наутро, фрлајќи гранати и пукајќи.
Акцијата траела дваесетина минути, а официјалниот извештај се уште не е составен.
Неколку од уапсените ја искористиле збунетоста за да избегаат, според полициски извор.
Не се знае судбината на лидерот на Трен де Арагуа, Хектор Гереро Флорес, познат како „Нињо Гереро“ (дете воин), кој одлежа 17-годишна затворска казна за убиство и трговија со дрога, пишува Дневник.хр.
Бандата Трен де Арагуа, која наводно има околу 5.000 криминалци, се појавила во 2014 година и се занимава со класичен мафијашки бизнис: киднапирање, грабеж, дрога, проституција, изнуда.
Истражувачкиот центар InSight Crime тврди дека групата е вклучена и во криумчарење мигранти, а своето влијание го проширила и на други активности, некои легални, но и на експлоатација на злато и илегално ископување.