Националното собрание на Виетнам во четвртокот го избра Во Ван Туонг за нов претседател на земјата, по кампањата против корупцијата што владее во земјата и оставката на неговиот претходник.
На вонредна седница пратениците го потврдија 52-годишниот Туонг за претседател, откако владејачката Комунистичка партија го предложи за функцијата, која е главно церемонијална, но една од четирите водечки политички позиции во оваа југоисточна азиска земја, пишува Ројтерс.
Изборот на Туонг следи по оставката на неговиот претходник Нгуен Ксуан Пук во јануари, откако владејачката Комунистичка партија го прогласи за виновен за прекршувања и неправилности од страна на функционерите под него, што се смета за голем чекор напред во борбата на земјата против корупцијата.
Во својот прв говор во парламентот како нов претседател, Туонг рече дека решително ќе ја продолжи борбата против корупцијата.
Ќе бидам целосно лојален на татковината, народот и уставот, настојувајќи да ги исполнам задачите што ми ги доделија партијата, државата и народот“, рече тој.
Туонг е најмладиот член на Политбирото на партијата, највисокото тело за одлучување во земјата, но се смета за партиски ветеран бидејќи ја започна својата политичка кариера на колеџ во комунистички младински организации.
Тој се смета за близок до генералниот секретар Нгујен Пу Тронг, најмоќната фигура во Виетнам и главен архитект на борбата на партијата против корупцијата, наведува Ројтерс.
Туонг е избран со 98,38 отсто од гласовите, според веб-страницата на виетнамскиот парламент.