Шефот на украинската делегација, Рустем Умеров, синоќа изјави дека претставници на Украина, Соединетите Американски Држави и европските земји ќе разговараат за повоениот план за економско закрепнување на Украина и безбедносните гаранции за таа земја на 4 и 5 ноември во Брисел.
Во објава на Фејсбук, Умеров изјави дека состанокот ќе се одржи во седиштето на Европската комисија, и дека, покрај украинските и американските претставници, ќе учествуваат и претставници на Велика Британија, Франција, Германија, НАТО и Светската банка.
Украинската страна ќе ја претставуваат тимови од министерствата за економија, финансии и одбрана, како и претставници од кабинетот на претседателот на Украина.
Според него, состанокот е продолжение на разговорите претходно одржани во Флорида и Осло, а целта е да се разговара за предлозите за повоена обнова, економски развој и долгорочна стабилност на Украина.
Умеров најави дека во четврток посебно внимание ќе се посвети на безбедносните гаранции за Украина, за што ќе се разговара со претставници на САД, Велика Британија, Франција, Германија и НАТО.
„Безбедноста, реконструкцијата и развојот мора да бидат дел од унифициран план за Украина по војната“, рече Умеров.
Европската комисија претходно објави дека денес, 4 ноември, во Брисел ќе се одржи состанок на претставници на САД, Украина, НАТО и неколку земји-членки на Европската Унија.