Украина врати 49 воени заробеници од Русија во последната размена на заробеници меѓу завојуваните соседи, објави во петокот украинскиот претседател Володимир Зеленски.
„Тоа се борци од вооружените сили на Украина, Националната гарда, полицијата, граничната служба и наши цивили“, напиша Зеленски на Телеграм.
Некои од групата беа заробени за време на одбраната на железарницата Азовстал во градот Мариупол во југоисточна Украина на почетокот на војната во 2022 година. Меѓу ослободените има 23 жени, рече украинскиот претседател.
Колку затвореници ѝ се предадени на Русија не се соопштува.
Сепак, Координативниот штаб за прашања на воени заробеници ја потврди размената.
Засега руската страна нема известување за размената.
Украина се брани од руската инвазија повеќе од две и пол години.
Според украинските податоци, Москва и Киев веќе разменувале затвореници 56 пати. Русија на украинската страна ѝ предаде вкупно 3.569 Украинци.
Околу 40 илјади руски војници во Курск
Во меѓувреме, Зеленски рече дека руската контраофанзива во нејзиниот југозападен регион Курск постигнала мал напредок.
„Тие сакаа брзо да се пробијат таму… досега не сме виделе сериозен успех“, рече Зеленски во Киев.
Тој додаде дека Москва има намера да распореди до 70.000 војници во регионот, кој Украина го нападна минатиот месец во ненадејна офанзива. Околу 40.000 руски војници веќе се во областа.
Нашата армија херојски се држи, рече Зеленски и истакна дека е задоволен од досегашните резултати од операцијата.
„Непријателот е запрен во регионот Харков и нивното напредување во регионот Доњецк е забавено“, рече тој, тврдејќи дека Русија била принудена да ги одврати војниците од своите офанзиви во северна и источна Украина за да ја брани својата територија во Курск.