Американскиот претседател Доналд Трамп доцна синоќа повторно го поддржа својот советник, милијардерот Илон Маск, поради критиките за неговиот план да ја намали федералната влада, велејќи дека може да остане „колку што сака“, но на крајот ќе се врати на своите бизниси.
„Илон е фантастичен“, им рече Трамп на новинарите на „Ер Форс 1“ додека леташе за американската сојузна држава Флорида.
Маск, лидерот на Tesla и SpaceX, се најде на удар на критики поради начинот на кој раководи со Одделот за владина ефикасност (DOGE), што доведе до отпуштање на илјадници владини работници.
Речиси 200.000 вработени се отпуштени, ќе бидат отпуштени или прифатиле отпремнина.
Поради ова беа вандализирани продавниците за автомобили Tesla во САД и светот, а за сабота е планиран национален протест против DOGE и агендата на Трамп.
Politico и ABC неодамна објавија дека Трамп им рекол на членовите на неговиот кабинет дека Маск наскоро ќе замине и ќе се врати во приватниот сектор, иако не беше јасно дали тоа значи дека Маск ќе замине пред да му заврши мандатот на крајот на мај.
Трамп синоќа изјави дека Маск може „да остане колку што сака“.
„Тој ќе остане одреден временски период, а потоа целосно ќе се врати на своите бизниси. Но, тој работи фантастична работа“, рече Трамп.
На прашањето колку долго ќе остане, Трамп рече: „Мислам дека неколку месеци“.
Белата куќа во средата објави дека Маск ќе остане на функцијата додека не ја заврши задачата на DOGE за намалување на владините трошоци и намалување на бројот на федерални вработени, отфрлајќи ги медиумските извештаи дека тој наскоро ќе се повлече од функцијата и ќе се врати во приватниот сектор, пренесува Хина.