Министерството за правда соопшти дека доверливите документи најверојатно биле „скриени и отстранети“ од домот на Доналд Трамп во Мар-а-Лаго, Флорида, во обид да ја попречат федералната истрага за владините документи незаконски земени таму.
За време на неодамнешниот претрес во Мар-а-Лаго, Федералното биро за истраги (ФБИ) заплени 33 кутии со повеќе од 100 доверливи документи кои биле скриени во канцеларијата на Трамп, според објавените делови од документот што е основа на налогот за претрес , јавува Гласот на Америка (ВоА).
Во тој објавен документ, беше навестено дека соработниците на Трамп можеби намерно ги опструирале властите за тоа дали строго доверливи документи се во Мар-а-Лаго.
Секретаријатот за правда соопшти дека претресот е извршен затоа што недостасуваат некои доверливи документи, но и дека постои сомнеж дека во куќата на Трамп се оставени уште документи и покрај тоа што поранешниот претседател тврди дека целиот материјал е одземен.
Зошто не ги вратил кога биле побарани?
Сепак, Секретаријатот за правда не одговори на прашањето кое најмногу ја интересира јавноста – зошто Трамп чувал одредени документи од Белата куќа и зошто не ги вратил кога биле побарани?
Во документот се вели дека членовите на ФБИ и Министерството за правда биле во Мар-а-Лаго на 3 јуни и дека претставникот на Трамп тогаш не објаснил зошто владините документи, вклучително и доверливите, биле таму година и пол откако Трамп ја напушти Белата куќа.
Посетата на Мар-а-Лаго се случи една недела откако Секретаријатот за правда издаде обврзувачки повик за враќање на документите.
Претставниците на Трамп тогаш тврдеа дека документите биле во складиште во куќата.
Но, Секретаријатот за правда по прегледувањето на видео снимката од куќата соопшти дека има индиции дека од таму се отстранети документите за да се попречи истрагата.
Не се соопштува кој ги отстранил документите.
Ќе биде назначен специјален судија
Кога агентите дојдоа во Мар-а-Лаго во август, пронајдоа документи и во канцеларијата на Трамп и во складиштето, според Министерството за правда.
Истрагата започна кога Националниот архив, кој ги чува сите документи од Белата куќа, објави дека недостасуваат некои документи.
Министерството за правда ги објави основите за налогот за претрес за да се спротивстави на барањето на Трамп да назначи специјален судија кој ќе го разгледа целиот случај.
Окружниот судија Ејлин Канон ќе ги слушне аргументите од двете страни во четврток.
Таа веќе посочи дека има намера да назначи специјален судија, но му даде можност и на Секретаријатот за правда да го каже своето мислење.