Претседателот на САД, Доналд Трамп, во интервју за „Фокс њуз“ тврдеше дека разговарал директно со иранските претставници по последниот бран воздушни напади и дека тие лично го молеле да престане со бомбардирањето на Иран.
„Нападите наскоро ќе престанат“, рече Трамп, но веднаш упати строго предупредување до Техеран дека нападите би можеле да продолжат доколку не се постигне конечен договор.
Американскиот претседател додаде дека однапред го предупредил Иран за оваа акција, кажувајќи им дека нивните позиции ќе бидат погодени „исклучително силно“.
Експресната реакција на Техеран: „Тоа е лага“
Реакцијата од иранската страна дојде невообичаено брзо.
Иранските државни медиуми веднаш пренесоа изјава од висок владин претставник кој остро негираше какви било разговори со Белата куќа.
„Не разговаравме со Трамп. Тоа е лажно тврдење кое служи само како покритие за американските напади“, рече висок ирански претставник.
Оваа јавна вербална конфронтација меѓу Вашингтон и Техеран се одвива во средината на драматична ескалација на Блискиот Исток.
Двете страни со денови разменуваат жестоки ракетни напади, иако Белата куќа до пред само неколку дена ја уверуваше јавноста дека мировниот договор е на дофат.
Последната рунда отворен конфликт беше предизвикана во понеделник вечерта, кога американски хеликоптер „Апачи“ беше соборен во близина на Ормутскиот теснец.