Претседателот на Соединетите Американски Држави, Доналд Трамп, ги повика републиканците во Конгресот итно да го усвојат предложениот буџетски пакет вреден 350 милијарди долари (Recon 3.0), наведувајќи дека планот ќе овозможи значително зголемување на воените средства и ќе вклучува низа мерки што ги нарече „Закон за заштеда на Америка“.
Во објава на социјалната мрежа True Social, Трамп оцени дека предложениот пакет е клучен за реализација на воениот буџет од 1,5 трилиони долари и модернизација на вооружените сили на САД.
„Ова е генерациска инвестиција во нашата војска, дури и поголема од (поранешниот) американски претседател (Роналд) Реган! Recon 3.0 е единствениот пат до целосниот воен буџет од 1,5 трилиони долари што им е потребен на нашите војници за да изградат арсенал на слобода“, рече Трамп.
Според неговите изјави, средствата би биле наменети за развој на системот за противракетна одбрана „Златна купола“, зајакнување на морнарицата, проширување на залихите на муниција, подобрување на програмата за воени беспилотни летала, како и развој на авиони Ф-47 и бомбардери Б-21.
Тој исто така рече дека пакетот ќе ја поттикне американската индустрија и ќе создаде стотици илјади работни места, тврдејќи дека нема да доведе до зголемување на инфлацијата.
Покрај воените апропријации, Трамп повика на законски мерки што вклучуваат задолжителна лична карта со фотографија за гласачите, доказ за американско државјанство при гласање и ограничување на гласањето по пошта на одредени категории гласачи, како што се припадници на војската, лица со попреченост и граѓани кои патуваат.
Меѓу предложените мерки се забрана за учество на трансродови лица родени како мажи во женски спортски категории, како и забрана за медицински процедури за промена на полот на малолетници.
Трамп ги повика републиканските пратеници да го усвојат пакетот без одложување или компромис, оценувајќи го како инвестиција од историско значење за безбедноста и иднината на Соединетите Американски Држави, пренесува Танјуг.