Американскиот претседател Доналд Трамп изјави во неделата дека странските влади ќе мора да платат „огромни суми“ за да се ослободат од високите царини, кои тој ги опиша како „лековити“.
Воведувањето високи царини за стоки увезени во САД предизвика бурни реакции на светските финансиски пазари, пренесува Ројтерс.
Азиските берзи утрово забележаа голем пад, бидејќи се верува дека новите царини би можеле да доведат до повисоки цени, послаба побарувачка, губење на довербата и потенцијално глобална рецесија.
Во разговор со новинарите во претседателскиот авион, Трамп нагласи дека не е загрижен за загубите кои надминуваат трилиони долари ширум светот.
„Не сакам загуби. Но понекогаш треба да пиете лекови за да поправите нешто“, рече американскиот претседател при враќањето од Флорида.
Тој рече дека разговарал во текот на викендот со лидери од Европа и Азија кои, како што вели, „умираат за да постигнат договор“ со него.
„Тие доаѓаат на маса да разговараат. Сакаат да разговараат, но не може да има разговори, освен ако не ни плаќаат големи суми на годишно ниво“, рече Трамп.
Неговата најава за царини минатата недела ги потресе економиите ширум светот, поттикнувајќи одмазднички тарифи од страна на Кина и поттикнувајќи ги стравувањата од глобална трговска војна и рецесија.