Судирите продолжија во јужен Либан и покрај тоа што Израел и Хезболах го прифатија американскиот план за делумно прекин на огнот.
Американскиот претседател Доналд Трамп изјави дека разговарал со двете страни и дека тие „се согласиле дека секое пукање ќе престане“, откако Иран предупреди дека израелската воена акција во Либан претставува закана за примирјето меѓу САД и Иран.
Либан изјави дека Хезболах го прифатил планот за запирање на нападите врз Израел и дека Израел не го напаѓа либанскиот главен град Бејрут.
Израелскиот премиер Бенјамин Нетанјаху го потврди договорот, но предупреди дека нападите врз Бејрут ќе продолжат „доколку Хезболах не престане да напаѓа израелски градови и цивили“.
Тој додаде дека израелската армија ќе продолжи да дејствува во јужен Либан.
Сепак, како што објавува Би-Би-Си, во текот на ноќта имало ново насилство.
Хезболах соопшти дека извршил три напади врз израелски тенкови и војници во близина на две села во северен Израел, користејќи беспилотни летала и артилериски гранати.
Израелската армија објави дека пресретнала две ракети испукани од Либан и дека нема повредени.
Либанската државна новинска агенција објави дека израелските напади се извршени во неколку јужни области, велејќи дека „многу силна детонација“ го потресла градот Дебин.