Американскиот специјален обвинител Џек Смит се спротивстави на барањето на поранешниот американски претседател Доналд Трамп да ја отстрани судијката Тања Чаткан од кривичната постапка против него под обвинение дека се обидел да ги промени резултатите од изборите во САД во 2020 година.
Смит, чија канцеларија го води случајот против Трамп, рече дека „нема валидна основа“ судијката Тања Чаткан да биде отстранета од случајот поради изјавите што ги дала претходно пред судот, а кои се чини дека се однесуваат на одговорноста на Трамп за инвазијата на неговите поддржувачи на Капитол, 6 јануари 2021 година, пренесува Ројтерс.
Во понеделникот, Трамп поднесе правно барање со кое бара Чаткан да се повлече од случајот, тврдејќи дека нејзините претходни изјави покренале прашања за нејзината непристрасност кон Чаткан и би ја загрозиле постапката.
Поднесокот упатува на коментарите што Чаткан ги даде за време на две рочишта за изрекување на пресудата за обвинетите за учество во немирите во Капитол, во кои таа рече дека немирите биле мотивирани од „слепа лојалност кон едно лице, кое сè уште е на слобода“.
Чаткан, која беше назначена од поранешниот американски претседател Барак Обама од редовите на демократите, остро го осуди нападот на Капитол и осуди одредени учесници во нападот на построги казни отколку што побараа обвинителите.