Најголемата руска онлајн страница за регрутирање HeadHunter објави оглас за оператори на дронови за учество во заштитата на воздушниот простор над Москва, без претходно искуство.
Во огласот за работа се вели дека се бараат кандидати за волонтерска единица наречена Борбени резервни сили, која има задача „да го чува главниот град безбеден со користење на модерни технички решенија и системи за надзор“.
„Ќе работите со високотехнолошка опрема дизајнирана да го заштити урбаниот простор“, се вели во него.
Описот на работното место вклучува подготовка и ракување со беспилотни летала пред летот, спроведување извидувачки мисии и „спроведување летови за собирање податоци, дење и ноќе“.
Потребни вештини
Кандидатите треба да имаат само „основни технички вештини“ и желба за напредување во областа.
Сепак, платата – која првично би изнесувала 1.950 американски долари месечно – е пониска од просечната плата во Москва, која надминува 2.600 американски долари.
Во прегледот на работодавачот, лицето потпишано како „Главен инспектор“ напишало дека станува збор за „одличен и поврзан тим“, со добри можности за напредување, позитивна работна средина, можност за избор на работни места според сопствените интереси и поддршка од претпоставените.
Тој додава дека платата е поврзана со работните перформанси, па затоа е можно да се зголеми заработката.
Ројтерс не можеше да утврди кога огласот е првпат објавен, но беше ажуриран на 1 јули.