Украинското национално антикорупциско биро (НАБУ) и Специјализираното обвинителство за борба против корупцијата (САПО) открија проневера на дури 733 милиони украински гривни (околу 16,5 милиони евра) за време на процесот на набавка на храна за украинската армија.
Во аферата се осомничени поранешен висок функционер на Министерството за одбрана, сопственик на неколку фирми за снабдување, двајца директори на фирми и уште едно лице.
Тие се обвинети за незаконска проневера на државни пари, во екот на сеопфатната руска инвазија, пишува „Украинска правда“.
Според резултатите од истрагата, храната за армијата во текот на 2022 и 2023 година била набавувана преку однапред склопени „пакети со храна“, составени од каталог во кој имало дури 409 артикли.
Сепак, само 10 проценти од производите – како зеленчук, житарки, месо и вода – редовно се нарачувале.
Останатите артикли, вклучувајќи зачини, желатин или бобинки, ретко или никогаш не bile на списокот поради нивната сезонска природа.
„Ваквиот систем им овозможи на добавувачите да манипулираат со цените – тие вештачки ги зголемија трошоците за најбараните производи, додека ги намалија цените на сезонските или помалку популарните производи како што се цреши и кајсии. На прв поглед се чинеше дека сè е во согласност со правилата, бидејќи вкупната цена на пакетот остана непроменета. Нарачаните производи имаа исклучително ниски цени“, се вели во соопштението за печатот на НАБУ.
Експертската анализа потврдила дека две фирми, кои се во сопственост на исто лице, на овој начин незаконски заработиле 16,5 милиони евра.
Дел од тие пари биле пренасочени преку исплата на дивиденди и наводна финансиска помош на поврзани фирми.
Инспекторите се сомневаат дека со тие средства е финансирано купувањето на хотел во Хрватска и друг имот.
Откако медиумите објавија информации, вклучително и веста за јајцата кои се платени по 17 гривни (околу 0,37 евра) по парче, осомничените ги намалија цените на 11 најбараните артикли.