Голем број туристички дестинации низ Европа летово се соочуваат со пожари, а во голем дел од случаите освен локалното население беа евакуирани и туристи.
Последниот пример е од соседна Грција, каде околу 2.000 туристи беа евакуирани од Крит поради голем шумски пожар што беснееше на југот од островот, додека грчките власти продолжија со превентивните евакуации на туристичките области и населби.
Што да направите ако ве зафати пожар на одмор?
Ако се најдете во област зафатена од пожар додека сте на одмор, најважно е да останете смирени и да ги следите упатствата на локалните власти.
Веднаш следете ги официјалните предупредувања и упатства од службите за итни случаи.
Доколку е наредена евакуација, не го одложувајте заминувањето и тргнете по препорачаната рута.
Понесете лични документи, телефон, полнач, лекови и основни потреби со вас.
Избегнувајте возење низ области зафатени од чад или пламен, бидејќи пожарите можат брзо да се шират.
Држете ги прозорците и вентилацијата затворени ако сте во близина на силен чад.
Ако сте на плажа или во хотел, следете ги упатствата на персоналот и спасувачите.
Не се враќајте во евакуираната област сè додека властите не кажат дека е безбедно.
На туристите им се препорачува да проверат пред да патуваат дали има предупредување за пожар на сила за дестинацијата и редовно да ги следат информациите од локалните власти и амбасадата на нивната земја за време на нивниот престој.
Доколку патуваат преку туристичка агенција, важно е да останат во контакт со претставниците на агенцијата за да добијат навремени информации за можни промени во сместувањето или организирана евакуација.