Германскиот канцелар Олаф Шолц денеска е во посета на Полска, при што со полскиот премиер Доналд Туск ќе разговара за зајакнување на соработката меѓу двете земји, особено во областа на одбраната.
Шолц и Туск ќе учествуваат и на консултации меѓу владите на двете земји, што е прва ваква средба од 2018 година, објави Ројтерс.
На тој состанок ќе учествуваат повеќе од 10 германски министри.
Односите меѓу Германија и Полска се подобрија откако про-ЕУ коалицијата на Туск дојде на власт во декември, ставајќи крај на осумгодишното владеење на партијата Право и правда (ПиС), која Германија ја нарече „непријателска сила“.
Посетата на Шолц и германската влада на Полска доаѓа во време кога двете земји се соочуваат со безбедносни предизвици поврзани со војната во Украина, наведува британската агенција.
„Безбедноста и кохезијата на Полска во НАТО се исклучително важни за Германија“, изјави извор од германската влада за Ројтерс.
Висок германски функционер рече дека безбедносната соработка меѓу двете земји со цел продлабочување на поддршката на Германија долж источното крило на Полска ќе биде клучен дел од консултациите.
Шолц сака Варшава да се приклучи на платформата Скај Шилд за заеднички европски набавки и управување со системи за противвоздушна одбрана, додека Туск бара поддршка за посебна стратешка одбранбена линија долж границата на балтичкиот регион со Белорусија и Русија, која исто така ќе вклучува воздушни системи, објави Политико.
Можен пакет за поддршка за одбрана на источната граница на Полска
Германскиот весник Зидојче Цајтунг во понеделникот објави дека за време на состанокот, Шолц ќе предложи пакет кој ќе вклучува поддршка за одбраната на источната граница на Полска, како и средства за жртвите на нацистичката германска окупација.
Германската влада веќе одобри средства за изградба на „германско-полска куќа“ во Берлин како спомен на жртвите од нацистичката окупација на Полска.
Германската министерка за култура Клаудија Рот по одлуката на владата изјави дека во Германија се уште малку се знае за нацистичките злосторства врз Полјаците и дека се убиени повеќе од пет милиони Полјаци.
„Германија сè уште има посебна историска одговорност кога станува збор за нејзиниот однос со Полска, нашиот сосед и, за среќа, уште еднаш нашиот близок партнер“, рече Рот.
Генералниот секретар на Христијанско-демократската унија (ЦДУ), најголемата германска опозициска партија, Пол Цимијак изјави за Политико дека се очекува Шолц да објави дека Германија ќе плати отштета на луѓето кои ја преживеале нацистичката тортура во Полска и кои немаат соодветно здравствено осигурување и живеат во сиромаштија.
Целта на Шолц е дополнително да ги подобри односите меѓу двете земји со овие потези, наведува „Политико“.
Лидерите на ПиС побараа Берлин да ѝ плати повеќе од трилион евра воени репарации на Полска, што Германија одби.
Сегашната полска влада се откажа од барањето за репарации, но министерот за надворешни работи Радослав Сикорски ја повика Германија да најде решение за компензација на полскиот народ за страдањата за време на нацистичката окупација.
Анкетите покажуваат дека мнозинството луѓе во Полска веруваат дека Германија треба да плати воени репарации.