Северна Кореја изјави дека Јужна Кореја ќе „ја плати цената“ за префрлање на одговорноста врз Пјонгјанг за експлозијата на мина во Демилитаризираната зона (ДМЗ) во која беа повредени двајца јужнокорејски војници и предупреди дека ќе возврати доколку Југот отвори оган врз севернокорејските трупи.
Сестрата на севернокорејскиот лидер Ким Јо Џонг ја обвини Јужна Кореја дека се обидува да најде „материјални докази“ за да ја потврди одговорноста на Пјонгјанг за инцидентот, објави Ројтерс.
„Водачите на провокациите треба да бидат подготвени да ја платат цената за фарсата што ја создадоа“, рече Ким Јо Џонг во соопштение објавено од новинската агенција KCNA.
Јужнокорејскиот министер за одбрана Канг Шин-чул денес изјави дека севернокорејските мини ја предизвикале експлозијата минатата недела и најави „соодветни“ мерки.
Јужна Кореја и Командата на ОН, која го надгледува примирјето во Корејската војна, ја истражуваат експлозијата од 21 септември во која беа повредени двајца членови на јужнокорејскиот тим за време на извидувачка мисија во рамките на ДМЗ.
Ким Јо Џонг изјави дека севернокорејските трупи никогаш не ја преминале воената демаркациска линија што минува низ средината на демалифицираната зона.
Сепак, Јужна Кореја соопшти дека има знаци дека севернокорејските војници ја преминале линијата за време на работата за утврдување на границата.
Северна Кореја изјави дека повеќе не го смета обединувањето за национална цел и дека Сеул е нејзин „главен непријател“, според Танјуг.