Кремљ во четвртокот објави дека „многу внимателно“ ја следи „драматичната“ реторика на новоизбраниот американски претседател Доналд Трамп, кој се закани со анексија на Гренланд, данска територија географски лоцирана на Арктикот, каде што Русија има предност.
„Арктикот е област на нашите национални интереси (…), ние многу внимателно го следиме прилично драматичниот развој на ситуацијата која, фала богу, досега остана на ниво на изјави“, рече портпаролот на Кремљ Дмитриј. Песков, додавајќи дека Русија сака таму да ги одржи мирот и стабилноста.
Трамп, кој ја презема функцијата на 20 јануари, оваа недела рече дека американската контрола на стратешки важниот арктички остров е „апсолутна неопходност“ и дека не ја исклучува употребата на воена или економска акција како тарифите наметнати на Данска за да се постигне ова.
„Нема планови за зголемување на сегашното воено присуство на САД на Гренланд“, изјави портпаролот на амбасадата за Ројтерс.
„Ќе продолжиме тесно да работиме со Копенхаген и Нук за да се осигураме дека сите предлози ги задоволуваат нашите заеднички безбедносни потреби.“
Гренланд е од клучно значење за американската војска и нејзиниот систем за рано предупредување за балистички ракети, имајќи предвид дека низ островот минува најкраткиот пат од Европа до Северна Америка.
Американската војска има постојано присуство во воздухопловната база Питуфик во северозападниот дел на Гренланд.
Високата претставничка за надворешна политика на ЕУ, Каја Калас, по експанзионистичките амбиции на Доналд Трамп на данска територија, рече дека суверенитетот и територијалниот интегритет на Гренланд мора да се почитуваат.
„Гренланд е дел од Данска (…) ние мора да го почитуваме територијалниот интегритет и суверенитет на Гренланд“, нагласи Калас во четвртокот.
Британскиот министер за надворешни работи Дејвид Лами во четвртокот изјави дека е сигурен оти за новоизбраниот американски претседател Доналд Трамп, Гренланд е дел од Кралството Данска, иако тој исто така рече дека реториката на Трамп може да биде дестабилизирачка.
„Од првиот мандат на Доналд Трамп знаеме дека интензитетот на неговата реторика, а понекогаш и непредвидливоста на она што тој го кажува може да биде дестабилизирачки фактор“, изјави Лами за радио Би-Би-Си, одговарајќи на прашање за намерите на Трамп да го направи Гренланд дел од САД.
„Претпоставувам дека во случајот со Гренланд, неговата загриженост за Русија и Кина на Арктикот или неговата загриженост за националната економска безбедност се присутни“, додаде Лами.
„Сигурен сум дека тој всушност признава дека Гренланд сега е дел од Кралството Данска.“