Неколку републикански сенатори признаа за NBC дека одлуката на претседателот Доналд Трамп да воведе царини на стоки од повеќе од 180 земји и територии може да предизвика пораст на цените и да ги погоди американските потрошувачи на краток рок.
„Во бизнисот, понекогаш треба да поминете низ краткорочна болка за долгорочна добивка. И ние не мислиме дека таа болка ќе трае долго – ако воопшто. Имаме доверба во претседателот“, рече сенаторот Марквејн Малин од Оклахома.
Републикански сенатор: Ако царините почнат да ѝ штетат на Америка, Трамп ќе се прилагоди
Сенаторката Синтија Лумис од Вајоминг рече дека Трамп пристапил кон воведувањето тарифи „сосема одговорно“, но таа сепак призна дека може да има непријатности за граѓаните.
„Со нетрпение очекувам да видам како ќе функционира. Веќе имаме земји кои му пристапија на претседателот и му рекоа: „Ние сме подготвени да соработуваме. Ќе ги намалиме нашите тарифи ако ги намалите вашите“, рече Лумис.
Сенаторот Џон Кенеди од Луизијана рече дека верува оти Трамп ќе ја преиспита одлуката доколку царините предизвикаат повеќе проблеми за Американците.
„Ако тарифите донесат придобивки, луѓето ќе сакаат повеќе од нив. Ако предизвикаат штета, ќе биде време да се приспособат“, рече Кенеди.
„Доколку царините почнат да ѝ штетат на Америка, верувам дека претседателот Трамп ќе реагира и ќе ги прилагоди“, додаде тој.