Русија е подготвена да најде „политичко и дипломатско решение“ за украинското прашање и ја цени „добро избалансираната“ позиција на Кина по ова прашање, изјави претседателот Владимир Путин, пренесува Анадолија.
Москва ја поздравува „подготвеноста на Пекинг значително да придонесе за решавање на кризата“, рече Путин во написот објавен од кинескиот весник „Пиплс дејли“ во неделата, ден пред посетата на претседателот Си Џинпинг на Москва.
„Русија е отворена за политичко и дипломатско решение на украинската криза. Не беше Русија таа што ги прекина мировните преговори во април 2022 година“, рече Путин.
Тој смета дека иднината на мировниот процес зависи исклучиво од волјата да се вклучи во значајна дискусија, имајќи ја предвид актуелната геополитичка реалност.
Условите што ѝ ги наметна Западот на Русија покажуваат дека таа е „одвоена од реалноста“ и дека не е заинтересирана за изнаоѓање решение, рече рускиот претседател.
Путин рече дека војната во Украина е „испровоцирана и дека Западот ревносно ја поттикнува“.
„Очигледно е дека има сили кои упорно работат на поделба на заедничкиот евроазиски простор на мрежа од „ексклузивни клубови“ и воени блокови кои би служеле да го кочат развојот на нашите земји и да им наштетат на нивните интереси. Ова нема да успее“, истакна Путин.
Тој рече дека Русија и Кина се „посветени на принципот на неделивост на безбедноста, што блокот на НАТО грубо го прекршува“.
„Длабоко сме загрижени за неодговорните и целосно опасни дејствија кои ја загрозуваат нуклеарната безбедност. Ги отфрламе нелегитимните еднострани санкции, кои мора да бидат укинати“, рече Путин.
Тој предупреди дека политиката на Вашингтон за „истовремено одвраќање на Русија и Кина, како и на сите оние кои не подлежат на американските диктати, станува се пожестока и поагресивна“.
„Русија е означена како „непосредна закана“, а Кина како „стратешки конкурент“, рече Путин.
Што се однесува до односите меѓу Москва и Пекинг, рускиот претседател рече дека посетата на Си ќе даде „нов силен поттик за нивната билатерална соработка“.
„Односите меѓу Русија и Кина достигнаа највисоко ниво во нивната историја и стануваат уште посилни. Нивниот квалитет ги надминува воено-политичките сојузи од времето на Студената војна, без никакви ограничувања или табуа“, рече Путин.
Приоритетите во односите вклучуваат трговско и економско партнерство, рече тој, додавајќи дека трговијата е двојно зголемена на 185 милијарди долари во 2022 година, а целта од 200 милијарди долари ќе биде надмината оваа година, а не во 2024 година.
Нашите земји, заедно со истомислениците, постојано се залагаат за формирање на поправеден мултиполарен светски поредок заснован на меѓународното право, а не на одредени „правила“ кои им служат на потребите на „златната милијарда““, рече Путин.
Сите информации поврзани со најновите случувања со војната во Украина можете да ги прочитате ТУКА.