На седум локации во Куманово деновиве ќе бидат поставени нови полуподземни контејнери за смет од страна на Јавното претпријатие „Чистота и зеленило“.
Како што информираше денеска директорот Ненад Стојановски, има елаборати за седум локации, а на дел од нив поставување е веќе завршено.
– Вчера беше поставување на локалитет „Сума“, претходно на градските гробишта и улица „11 Ноември“ и оваа работа ќе продолжи и на останатите локации кои ги имаме добиено од Секторот за комунални дејности при Општина Куманово, а тоа е улица „Боро Прцан“, „Гуцман“ „Тоде Думба“, „Трета МУБ“ како и „Моша Пијаде“ и понатаму ќе продолжиме веќе сме во преговори за определување на други локации, изјави Стојановски.
Како што појасни полупоземните контејнери имаат пет пати поголем капацитет од обичните и со тоа ја олеснуваат и работата на комуналнците, но и депонирањето на граѓаните.
– Со тоа би го заштитиле сметот да не завршува околу контејнери, со оглед дека полуподземни контејнери кои изгледаат естетски поубаво, и нивната зафатнина која менува пет обични контејнери. Еден полуподземен контејнер има зафатнина од 5,5 метри кубни за разлика од еден подвижен обичен сад со зафатнина од 1,1 метар кубен, рече Стојанвоски.
Јавното претпријатие располага со околу 40 полуподземни контејнери како залиха и во наредните месец до два ќе се поставуваат и на други локации за кои ќе добијат одобрение од општината.
Тој вели дека иако помалку, сепак и овие контејнери се изложени на оштетувања од граѓаните, особено оние кои во нив фрлаат пепел и жар од печките па предизвикуваат пожар.
– Цена на чинење на еден таков сад е 6-7 илјади евра и ние тешко доаѓаме до нив. Овие што ги имаме се набавени од Општина Куманово со определени ставки во буџетот, но и со проекти. Ние разгледуваме можности за проекти и самостојно како ЈП „Чистота и зеленило“, но тоа се контејнери до кои тешко се доаѓа, вели директорот.
Тој упати апел граѓаните во нив да депонираат само комунален отпад, а до инспекциските служби повик да ги санкционираат оние кои ги уништуваат.
Никола Ивановски