Кумановци од денеска можат бесплатно да се лизгаат на лизгалиштето поставено во непосредна близина на градскиот базен.
Опремата која општината ја доби од Агенцијата за млади и спорт е поставена претходните денови.
Граѓаните ќе можат да го користат без надокнада, изјави денеска градоначалникот Максим Димитриевски.
– Ја користам приликата да се заблагодарам на Агенцијата, ние го ставивме во функција. Трошоците за функционирање ќе бидат на товар на општината и на јавното претпријатие „Чистота и Зеленило“ кое ќе менаџира-изјави Димитриевски.
Тој изрази надеж дека ќе се почитуваат правилата за користење и појасни дека малолетните ќе мора да доаѓаат со родител или старател, кои потпишуваат изјава, по што се добиваат лизгалки и се користат бесплатно.
Димитриевски вели дека претходно размислувале да го постават и на градскиот плоштад, но таму немало простор. За наредната година, додава Димитриевски, опремата ќе се искористи и како дел од зимско новогодишно село.
– Се надевам дека најмладите ќе уживаат во лизгањето-изјави Димитриевски.
Лизгалиштето ќе биде поставено до крајот на зимата.