Портпаролот на Кремљ, Дмитриј Песков, денес изјави дека нема причина за оптимизам кога станува збор за постигнување мир во Украина, бидејќи, како што изјави, ставот на Киев го блокира патот кон мирот.
„Киевскиот режим и квазиполитичкиот простор на киевскиот режим се многу нејасни. Гледаме дека многу луѓе таму, се разбира, се обидуваат да ловат во темнина, некои се обидуваат да се повикаат на демократијата и демократските норми, додека други дури и не се обидуваат да го сторат тоа. Но, де јуре, ситуацијата е токму онаква каква што (рускиот) претседател (Владимир) Путин ја опиша многу пати“, изјави Песков пред новинарите, објави Спутник.
Точниот датум на новата посета на американските преговарачи Стив Виткоф и Џаред Кушнер на Русија сè уште не е утврден, но Кремљ не крие дека нивните посети се уште се дел од дипломатскиот канал меѓу Москва и Вашингтон.
Тој објасни дека американските преговарачи во моментов активно работат на други прашања од американската надворешна политика.
Сепак, тонот од Кремљ е далеку од затворање на вратата. Песков нагласи дека Виткоф и Кушнер се „секогаш добредојдени гости“ во Москва, како соговорници на претседателот Владимир Путин и други руски функционери со кои се во постојан контакт.
Тоа е важен сигнал во време кога дипломатските канали меѓу Москва и Вашингтон сè уште се одржуваат, и покрај застојот и различните ставови за Украина.
Кремљ претходно објави дека очекува да продолжи со контактите со двајцата американски претставници кога ќе можат да се посветат на украинското прашање.
Виткоф веќе имаше неколку директни контакти со Путин, додека Кушнер е вклучен во најчувствителните дипломатски процеси на Вашингтон. Нивната улога покажува дека Белата куќа сè уште користи директни канали за разговор со руската страна.
Во исто време, Песков истакна дека Москва високо ги цени напорите на земјите што се обидуваат да придонесат за прекин на конфликтот во Украина.
Иако датумот на нивното ново пристигнување во Москва не е познат, самиот факт што Кремљ јавно ја потврдува својата отвореност за нивното пристигнување остава простор за нова дипломатска рунда.