Палестинските групи на отпор денеска повикаа на одбрана на комплексот џамија Ал Акса во окупираниот Источен Ал-Кудс (Ерусалим) од израелски прекршувања и напади, јавува Анадолија.
Палестинците ја одбележуваат 53-годишнината од нападот на Ал Акса, кој во 1969 година го изврши екстремистичкиот австралиски турист Денис Мајкл Рохан.
Палестинската група Хамас ги повика арапските и муслиманските народи да ја преземат својата историска одговорност да ја заштитат Ал Акса од израелските заговори и обидите за јудаизација.
„Ерусалим и Ал Акса се јадрото на конфликтот со непријателот и компасот за обединување на нашиот народ и нација. Нема никаков суверенитет или легитимитет во окупацијата на ниту еден сантиметар од Ал Акса“, рече Хамас.
Групата Исламски џихад во Палестина, исто така, ги повика Палестинците да продолжат да ја бранат Ал Акса со сите средства.
„Отпорот во сите форми е клучот за одбраната на Ерусалим, кој ќе остане арапски и исламски“, се наведува во соопштението на движењето.
Уништени делови од џамијата
Екстремистот Мајкл Рохан ја запали џамијата Ал-Акса на 21 август 1969 година, уништувајќи неколку нејзини делови, вклучително и илјада години стара говорница од дрво и слонова коска која датира од времето на прославениот муслимански освојувач Саладин.
Пожарот го уништи и михработ на муслиманскиот калиф Омар бин ал-Хаттаб, заедно со големи делови од украсената внатрешност на џамијата и позлатената дрвена купола.
Два дена по нападот, израелските власти го уапсија Рохан, велејќи дека страда од тешка ментална болест и на крајот го депортирале назад во неговата родна Австралија.
Муслиманските земји одговорија на инцидентот со формирање на мултилатерална организација на исламската конференција, која подоцна беше преименувана во Организација за исламска соработка.
На 15 септември 1969 година, Советот за безбедност на Обединетите нации ја усвои резолуцијата 271, со која се осудува деструктивниот напад на џамијата и се осудува Владата на Израел за непочитување на резолуциите на ОН.