Мисијата на Обединетите нации во Нагорно-Карабах соопшти дека по егзодусот во кој повеќе од 100.000 Ерменци избегаа од регионот во последните неколку дена, останаа само 50 до 1.000 припадници на ерменската етничка заедница.
Во соопштението објавено на веб-страницата на ОН по еднонеделната мисија предводена од постојаниот координатор на ОН во Азербејџан заедно со други високи претставници на агенцијата, се наведува дека нема знаци на оштетување на јавни објекти во градот Степанакерт.
„Мисијата беше погодена од начинот на кој локалното население ненадејно ги напушти своите домови и страдањето што ова искуство мора да го предизвика“, рече тимот на ОН, додавајќи дека не слушнале извештаи за насилство врз цивили од локалното население со кое разговарале по најновите прекин на огнот.
Тимот на ОН од локални соговорници дознал дека меѓу 50 и 1.000 етнички Ерменци останале во регионот Нагорно-Карабах, пренесува Танјуг.
Се додава дека тимот на ОН забележал дека владата на Азербејџан прави подготовки за обновување на одредени комунални и здравствени услуги во градот Степанакерт.
Мисијата на ОН не доби пристап до руралните области, но не беа забележани знаци на уништување на земјоделската инфраструктура или добитокот, се вели во извештајот.