Канцеларијата на Обединетите нации за координација на хуманитарни прашања (OCHA) објави дека поради ескалацијата на конфликтот во Јемен од почетокот на септември, најмалку 125.000 луѓе се раселени, додека бројот на цивилни жртви продолжува да расте.
OCHA соопшти дека луѓе од најмалку 18.000 домаќинства биле принудени да ги напуштат своите домови од почетокот на месецот.
Организациите за помош обезбедиле помош на илјадници домаќинства до 12 септември, но предупредиле дека залихите се критично мали поради недостаток на средства, објавува Ал Џезира.
Движењето на хуманитарците останува суспендирано на неколку локации по должината на западниот брег на Јемен поради насилство, додека клучните патишта остануваат ограничени или целосно непроодни, се додава во соопштението.
Бунтовниците Хути, движење кое го контролира главниот град Сана и голем дел од западен Јемен, започнаа голема офанзива на југ по должината на брегот на Црвеното Море.
Владините сили, поддржани од Саудиска Арабија, се обидуваат да го спречат напредувањето на Хутите, а Саудиска Арабија одговори со воздушни напади.
Ова практично повторно отвори голем фронт кој беше релативно мирен со години.