Македонија, Србија, Црна Гора и Босна и Херцеговина успеаја да воспостават свој регулаторен пазар и од 30-ти следниот месец, овие држави ќе можат меѓусебно да комуницираат по драстично намалени цени во роаминг, изјави денеска министерот за информатичко општество и администрација, Иво Ивановски.
Според потпишаната Спогодба помеѓу четирите држави, македонските државјани од 30 јуни при патување во Србија, Босна и Херцеговина и Црна Гора за минута разговор во роаминг ќе плаќаат 17,9 денари. Поевтинувањето на разговорите е за 73 отсто, додека цената на мобилниот интерент во роаминг ќе се намали за речиси 90 отсто, а еден мегабајт ќе чини 43 денари. Се намалува и цената на СМС пораките кон овие земји од 12,3 денари на 5, 6 денари за порака.
За регулацијата на електронските комуникации, регулаторните мерки и помош за поттик на развојот на нови технологии, како и новите услуги за сите корисници на оваа индустрија се дебатира на тридневната Меѓународна регулаторна конференција што се одржува од денеска во организација на македонската Агенција за електронски комуникации (АЕК).
Македонија и соседните држави, изјави Ивановски, успеаја многу побргу од Европската унија да се усогласат за роаминг тарифата.