Италијанската премиерка Џорџа Мелони ја осуди пресудата на лидерот на француската крајнодесничарска партија Национален собир (РН), Марин Ле Пен.
Како што наведе таа, ниту еден човек кој се залага за демократија не може да биде задоволен од пресудата што го засега лидерот на „големата партија“.
„Не знам кои се причините за ваквата силна одлука, но мислам дека никој што се грижи за демократијата не може да биде среќен поради пресудата што влијае на лидерот на една голема партија и која му го одзема правото да застапува милиони луѓе“, изјави Мелони за италијанскиот весник „Ил Месаџеро“, како што пренесува бриселски Политико.
Францускиот суд ја осуди Ле Пен на четиригодишна затворска казна, од кои две години условни, како и парична казна од 100.000 евра.
Освен Ле Пен, уште осум пратеници од нејзината партија РН беа осудени за проневера на јавни средства.
Пресудата, исто така, и забранува на Ле Пен да учествува на изборите, што автоматски значи дека и е забрането да се кандидира за францускиот претседател во 2027 година, дури и ако поднесе жалба.
Ле Пен рече дека пресудата ја „елиминирала“, но и „гласовите на милиони Французи“.