Одделението за очни болести од кумановската општа болница почна со оперативна катарактна хирургија, соопштија денеска надлежните од јавната здравствена установа.
Директорката на болницата, Биљана Ивановска информираше дека оперативната катарактна хирургија со имплантација на интраокуларни леќи се реализира со поддршка на Клиниката за очни болести.
– Обезбедени се едукатори кои ќе помогнат во обучување на младите доктори офталмолози во нашата установа. Нашите сограѓани кои имаат дијагноза катаракта може да се обратат до одделение за очни болести за првична дијагностика и оперативен третман. Одделението располага со интраокуларни леќи „Енвиста“, изјави директорката на болницата, Биљана Ивановска.
Од болницата се надеваат дека проектот ќе овозможи навремена дијагностика на пациентите. Во моментов вклучени се три лекари специјалисти офталмолози во соработката со очната клиника од Скопје.
Претходно, болницата целосно ја опреми и оперативната сала на одделението за очни болести.
МИА