Општина Куманово наскоро ќе располага со ново современо противпожарно возило со корпа и хидраулична скала висока 32 метри, кое ќе ги зголеми капацитетите на Територијалната противпожарна единица.
Тројца припадници на кумановската ТППЕ во моментов престојуваат на шестдневна обука во Австрија (Ватенс и Тирол) и Хрватска (Вуковар), каде што се запознаваат со спецификациите и функционалностите на возилото.
По завршувањето на обуката, возилото ќе биде ставено во функција и ќе биде подготвено за брза и ефикасна интервенција при пожари и други вонредни ситуации.
„Како градоначалник останувам посветен на унапредување на безбедноста во нашиот град и на обезбедување подобри услови за работа на пожарникарите, кои се секогаш на првата линија во заштита на човечки животи и имот“, изјави градоначалникот Максим Димитриевски.
Станува збор за донација, која кумановската противпожарна служба ќе ја добие од австриската покраина Тирол.
Никола Ивановски