Началникот на Генералштабот на полската армија, генерал Вислав Кукула, денеска предупреди дека ако наскоро се договори мир во Украина, како што ветува новоизбраниот американски претседател Доналд Трамп, Русија може да ги обнови своите вооружени сили и пред 2029 година и да биде подготвена за конфликт со НАТО уште порано.
„Русија има демографски потенцијал и суровини и што е најважно, воена индустрија која добро функционира не само кога има војна, туку истовремено го развива и одбранбениот потенцијал на земјата. Крајот на конфликтот во Украина во голема мера ќе ја олесни реконструкцијата на Русија и зајакнување на вооружените сили“, изјави генералот Кукула за полскиот весник „Жечпосполита“.
Неодамнешната прогноза на германските генерали предвидува можност Русија да биде подготвена за нова војна и конфликт со НАТО веќе во 2029 година, додека полскиот генерал верува дека завршувањето на војната во Украина ќе го скрати тој рок, но дека тоа не зависи само за подготвеноста на Москва.
„Војната е вистинска закана. Дали и кога ќе избие војна зависи до одреден степен од нас. Нападот врз земја која е подготвена да се брани и чие население е подготвено да се бори е огромен ризик. Агресијата секогаш е поттикната од слабост“, рече полскиот генерал.
Кукула рече дека е убеден дека сојузниците нема да ја остават Полска на цедило да се брани доколку биде нападната од Русија или Белорусија.
„Да, сигурен сум. НАТО денес е сосема поинаква организација отколку пред 10 години. Сигурно е дека нема да се браниме“, рече Кукула.
Според началникот на Генералштабот, Полска секако веднаш би им помогнала на балтичките земји доколку бидат нападнати од Русија.
„НАТО функционира така. Безбедноста на Полска започнува во Естонија и другите балтички земји. Борбата за секој сантиметар од територијата на алијансата е клучна за кредибилитетот на НАТО. Исто така, треба да се запомни дека одбраната на балтичките земји не е можна без Полска бидејќи тоа е единствената копнена врска на тие земји со остатокот од алијансата“, рече Кукула.