Максим Орешкин, советник на рускиот претседател, изјави дека Соединетите Американски Држави ја убиваат европската економија, додавајќи дека „штом ќе завршат со канибализирање на нивните европски партнери, ќе се фокусираат на азискиот пазар“.
„Сега најважното прашање за водечките играчи е каква ќе биде рамнотежата на силите на растечките пазари. Штом САД ќе завршат со канибализирање на своите европски партнери, убивајќи ја европската хемиска, автомобилска и други индустрии, ќе се фокусираат на азиските пазари“, изјави Орешкин во интервјуто за магазинот „Експерт“, пренесува РИА.
Тој додаде дека во светот се води „трка за суверенитет“ и дека дури и западните земји, „главните проповедници на глобализацијата“, почнале да се борат за суверенитет во многу области.
Според него, постојат три нивоа на суверенитет – државен што се однесува на политичкиот и безбедносниот систем, јавен што се однесува на образованието и културата и економскиот.
„Ако ги изоставиме светските суперсили, како што се Кина, САД или Индија, тогаш дури и релативно мала земја како Обединетите Арапски Емирати постигна значителен напредок во последните години во зајакнувањето на сопствениот суверенитет“, рече Орешкин.
Во исто време, рече тој, ОАЕ ги штити вредностите на сопственото население.