Кина им нареди на своите авиокомпании да ги прекинат сите идни испораки на авиони Боинг од американско производство како одговор на новите американски царини наметнати на кинески стоки од страна на претседателот Доналд Трамп.
Како што објави Блумберг, а како што потврдија извори блиски до владата, покрај забраната за нови испораки, кинеската влада препорача и привремено запирање на набавката на авионска опрема и делови од американски компании, што дополнително го влошува трговскиот конфликт меѓу двете земји.
Одлуката на Пекинг дојде откако кинеските власти минатиот викенд воведоа одмазднички тарифи од 125 отсто за американските стоки, вклучително и авиони и нивни делови, што ќе ги удвои трошоците за увоз на авиони од САД, што ќе ги направи непрофитабилни за кинеските превозници.
Акциите на Боинг паднаа за 4,6 отсто по објавувањето на веста.
Севкупно, годинава тие се во пад од околу 10 отсто, а како што пренесува Блумберг, компанијата се уште не ја коментирала ситуацијата.
Кина е еден од најважните пазари за Боинг, кој во 2018 година испорача речиси четвртина од своето производство во таа земја.