Израелската разузнавачка агенција Мосад поставила мала количина експлозив во 5.000 пејџери од тајванско производство нарачани од либанската група Хезболах неколку месеци пред вчерашните детонации, изјавија безбедносни извори за Ројтерс.
Операцијата претставува невидено нарушување на безбедноста од страна на Хезболах, во која илјадници пејџери беа детонирани низ Либан, при што загинаа девет лица и беа ранети речиси 3.000, вклучително и борците на групата и иранскиот амбасадор во Бејрут.
Проиранскиот Хезболах вети дека ќе му се одмазди на Израел, чија армија одби да ги коментира експлозиите, пренесува Индекс.
Заговорот траел со месеци
Се чини дека заговорот траел со месеци, изјавија неколку извори за Ројтерс.
Висок либански безбедносен извор изјави дека групата нарачала 5.000 пејџери произведени од тајванската компанија Gold Apollo.
Неколку извори рекоа дека тие биле донесени во земјата претходно оваа година.
Еден извор идентификуваше фотографија од модел на пејџер, AP924, кој како и другите пејџери безжично прима и прикажува текстуални пораки, но не може да остварува телефонски повици.
Борците на Хезболах користат пејџери како ниско-технолошки средства за комуникација во обид да избегнат израелско следење на локациите на мобилните телефони, изјавија за Ројтерс два извори запознаени со операциите на групата.
Но, висок либански извор рече дека израелската шпионска служба ги модифицирала уредите „на ниво на производство“.
„Мосад вметнал табла во уредот што има експлозивен материјал кој прима шифра. Многу е тешко да се открие на кој било начин. Дури и со било кој уред или скенер”, рекол изворот.
BREAKING: Thousands of messaging pagers used by Hezbollah reportedly exploded all across Lebanon in a cyberattack straight out of a cyberpunk scifi novel.
More than a thousand Hezbollah members have been reportedly injured, according to Lebanese security sources. pic.twitter.com/knnCUpSEO9
— Ian Miles Cheong (@stillgray) September 17, 2024
Експлозиите биле предизвикани од шифрирана порака
Изворот рече дека 3.000 пејџери експлодирале кога им била испратена шифрирана порака, истовремено активирајќи експлозив.
Друг безбедносен извор за Ројтерс изјавил дека во новите пејџери биле скриени до три грама експлозив.
Во 15 часот и 30 минути по локално време во Либан, корисниците на пејџер добиле порака која се чинело дека доаѓа од раководството на Хезболах, објави Њујорк Тајмс.
Уредите биле програмирани да звучат неколку секунди пред да експлодираат.
Тајванска компанија: Производот не беше наш. Само го имаше нашето лого на него
Основачот на тајванската компанија Gold Apollo, Хсу Чинг-Куанг, рече дека пејџерите користени во детонациите во вторникот во Либан не се произведени од компанијата, туку од компанија во Европа која има право да го користи заштитниот знак на тајванската компанија.
„Производот не беше наш. Само го имаше нашето лого на него“, рече тој.
Хсу не ја именуваше компанијата што ги произведува пејџерите, додавајќи дека жртва на инцидентот бил и Gold Apollo.
„Ние сме одговорна компанија. Ова е многу срамно“, рече тој.
Сликите на уништените пејџери, анализирани од Ројтерс, покажаа формат и налепници на задната страна кои се во согласност со пејџерите направени од Gold Apollo со седиште во Тајпеј.
Во февруари Хезболах подготви воен план со цел да се решат недостатоците во разузнавачката инфраструктура на групата.
Околу 170 борци веќе се убиени во целните израелски напади врз Либан, вклучително и висок командант и висок функционер на Хамас во Бејрут.
Во телевизискиот говор на 13 февруари, генералниот секретар на групата, Хасан Насрала, строго ги предупреди поддржувачите дека нивните телефони се поопасни од израелските шпиони, велејќи дека треба да ги скршат, закопаат или заклучат во железна кутија.
Наместо тоа, групата одлучи да ги дистрибуира пејџерите на членовите на Хезболах во различни гранки на групата – од борци до медицински лица кои работат во нејзините служби за помош.
Голема ескалација
Експлозиите осакатија многу членови на Хезболах, според болничките снимки прегледани од Ројтерс.
Ранетите имале повреди од различен степен на лицата, недостигаат прсти и отворени рани на страните, каде најверојатно носеле пејџери.
„Навистина сме силно погодени“, изјави висок либански безбедносен извор со директно познавање на истрагата на групата за експлозиите.
Експлозиите на пејџер се случија во време на зголемени тензии меѓу Израел и Хезболах, кои се вклучени во прекугранична војна од избувнувањето на конфликтот во Газа минатиот октомври.
Додека војната во Газа беше главниот фокус на Израел по нападот на 7 октомври од вооружени лица предводени од Хамас, неизвесната ситуација долж северната граница на Израел со Либан ги подгреа стравувањата од регионален конфликт во кој би можеле да бидат вклучени САД и Иран.
Ракетниот бараж на Хезболах ден по 7 октомври ја отвори последната фаза од конфликтот и оттогаш секојдневно се разменуваат ракети, артилериски оган и проектили, а израелската авијација напаѓа длабоко на либанска територија.
Хезболах рече дека не сака поширока војна, но ќе се бори доколку Израел ја започне.
Израелскиот министер за одбрана Јоав Галант му рече на американскиот секретар за одбрана Лојд Остин во понеделникот дека се затвора прозорецот за дипломатско решение на конфликтот со движењето Хезболах поддржано од Иран во јужен Либан.
Сепак, експертите велат дека не ги гледаат експлозиите на пејџер како знак дека израелска копнена офанзива е неизбежна.
Наместо тоа, тоа е знак за очигледно длабоката пенетрација на израелското разузнавање во Хезболах.