Јужнокорејскиот претседател Јун Сук-Јул денеска остро ја критикуваше репресивната политика на Северна Кореја и вети дека ќе постигне слободна и обединета Кореја, само неколку недели откако севернокорејскиот лидер Ким Џонг Ун ја отфрли идејата за мирно обединување на двете земји и се закани со воена окупација на југот во случај на војна.
Јужнокорејскиот претседател Јул зборуваше на 1 март на Денот на движењето за независност, празник во чест на корејското востание во 1919 година против јапонската колонијална власт.
Откако стана претседател во 2022 година, тој работеше на зајакнување на воената соработка со САД и се обидуваше да ги реши историските спорови што Јужна Кореја ги има со нејзиниот сосед Јапонија, со цел да создаде посилно партнерство на линијата Сеул-Вашингтон-Токио против нуклеарните закани со тоа што доаѓаат од Северна Кореја.
Спротивните коментари на Јул и Ким за обединувањето доаѓаат во време на зголемени тензии на Корејскиот полуостров, кои траат повеќе од две години, при што Северна Кореја ги засили ракетните тестови, а Југот ги прошири воените вежби со американската војска.
Корејскиот полуостров е поделен од крајот на Корејската војна која траеше помеѓу 1950 и 1953 година и оттогаш обединувањето е декларирана цел на секој лидер на двете земји.
Постои добро воспоставена граница меѓу двете земји, а изгледите за обединување на богатиот, демократски југ и номинално социјалистичкиот, авторитарниот и сиромашниот север во блиска иднина се исклучително слаби, велат многу експерти.