Високи функционери од Јужна Кореја, Соединетите Американски Држави и Јапонија разговараа по телефон за најновите лансирања на балистички ракети од Северна Кореја и можните одговори, објави денес јужнокорејското Министерство за надворешни работи.
Вчера, Северна Кореја испали околу 10 балистички ракети со краток дострел во правец на Источното Море од областа Вонсан, според јужнокорејскиот Заеднички Генералштаб, објави Јонхап.
Државните медиуми во Пјонгјанг објавија дека за време на демонстрацијата на оружјето биле користени повеќекратни ракетни лансери, тактички крстосувачки ракети и ракети воздух-земја.
Во разговорот учествувале претставници од министерствата за надворешни работи на трите земји, кои разменувале информации и разговарале за понатамошни одговори.
Сеул изјави дека трите земји одржуваат редовен канал за брза размена на информации по лансирањата на ракети од Северна Кореја.
Најновите лансирања доаѓаат една недела откако Јужна Кореја предложи воени разговори со Пјонгјанг за решавање на споровите околу демаркацијата.