Претседателот на иранскиот парламент Мохамад Багер Калибаф повика на национална кампања за намалување на потрошувачката на природен гас за најмалку 10 отсто, поради очекуваниот недостиг во текот на претстојната зима.
„За да се надмине претстојната зима, неопходен е заеднички напор на ниво на целата земја за да се намали потрошувачката на гас за најмалку 10 отсто“, рече Калибаф во видео пораката што ја пренесоа иранските медиуми.
Иако е еден од главните производители на природен гас, Иран долго време се соочува со недостиг на оваа енергија, неопходна за греење на домаќинствата.
Во текот на зимата, температурите во некои делови од земјата честопати паѓаат под нулата, според Ал Џезира.
Калибаф најави и паричен надоместок за граѓаните кои ја намалуваат потрошувачката.
„Секој што штеди гас, без разлика на износот, ќе добие соодветна сума пари директно на својата банкарска сметка, што ќе им овозможи на сите да го видат конкретното влијание на тие заштеди врз буџетот на домаќинствата“, рече тој.
Недостигот дополнително се влоши со конфликтот на Иран со САД и Израел, кој започна во февруари. Според извештаите од Техеран, за време на најинтензивната фаза на борбите, која траеше речиси 40 дена, нападите ги погодија клучните ирански капацитети, вклучително и капацитетите за преработка на природен гас.