Иранскиот претседател Ебрахим Раиси рече дека смртта на младата жена Махса Амини во притвор ги „тажи“ сите во Исламската Република, но предупреди дека хаосот од ширење протести по тој повод е неприфатлив.
– Сите сме тажни поради овој трагичен инцидент, но хаосот сѐ уште е неприфатлив – рече Раиси во интервју за државната телевизија, пренесе Ројтерс.
– Црвената линија на Владата е безбедноста на нашиот народ… Не може да се дозволи да се нарушува мирот во општеството со немири – додаде иранскиот лидер.
Иранската полиција и безбедносните сили претходно се судрија со демонстрантите во градовите низ Иран каде продолжија протестите за смртта на Махса Амини, објавија државните и социјалните медиуми, пренесува Ројтерс.
И покрај тоа што голем број демонстранти беа убиени и полицијата употреби боева муниција и солзавец, видеата на социјалните мрежи покажаа демонстранти кои повикуваат на пад на свештеничката власт и судири со безбедносните сили во Техеран, Табриз, Карај, Ком, Јазд, Санандаи и други градови.
Протестите траеја 11 дена и загинаа најмалку 41 лице, а околу 900 беа повредени.
Иранските власти формираа специјален суд за учесниците на протестите, објавија државните медиуми.