Инфлацијата во Велика Британија во текот на мај, за прв пат во последните три години, се врати на целното ниво од два отсто, објави британското биро за статистика.
Ценовните притисоци остануваат силни, што сугерира дека Банката на Англија ќе чека уште некое време пред да ги намали каматните стапки, покажуваат официјалните статистики.
Податоците на Националниот статистички институт покажуваат и дека инфлацијата на цените на услугите била 5,7 отсто, што е за 5,9 отсто помалку во однос на април.
Падот на инфлацијата делумно е предизвикан од намалувањето на регулираните сметки за енергија во домаќинствата во април, како и пониските цени на храната, пренесува Ројтерс.
Пониските цени на храната беа најголемото повлекување на инфлацијата во мај, намалувајќи ја годишната стапка на инфлација на храната и безалкохолните пијалоци на 1,7 отсто од 45-годишниот максимум од 19,2 отсто во март 2023 година.
Повеќето економисти анкетирани од Ројтерс мислат дека централната банка ќе започне со намалување на стапките од 16-годишниот максимум од 5,25 отсто во август, додека финансиските пазари го гледаат првиот потег поверојатно во септември или ноември.
Инфлацијата во повеќето западни економии почна да расте во втората половина на 2021 година поради пандемијата COVID-19, а потоа дополнително се зголеми откако руската инвазија на Украина во февруари 2022 година предизвика скок на цените на природниот гас.
Потрошувачките цени во Британија пораснаа за околу 20 отсто во последните три години, намалувајќи го животниот стандард и придонесувајќи за непопуларноста на конзервативците, кои во анкетите заостануваат зад опозициската Лабуристичка партија за околу 20 поени.