Градоначалникот на Мајами, Френсис Суарез, најави дека ќе се кандидира за претседател, приклучувајќи се на редовите на републиканските кандидати кои се борат за номинација во 2024 година, неколку дена откако фаворитот Доналд Трамп се соочи со обвинувања за лошо постапување со доверливи документи.
Суарез (45) објави видео за неговата кампања насловена како „Трчам“, на кое се гледа како трча низ градот.
Во интервју за емисијата „Добро утро Америка“ на ABC, тој ја нарече својата визија „промена на генерациите“, пренесува Хина, повикувајќи се на Ројтерс.
Кубано-американецот е одговорен за технолошкиот бум во Мајами.
Тој е единствениот хиспано-американски кандидат меѓу републиканските кандидати и трет кандидат од Флорида, заедно со поранешниот претседател Трамп и гувернерот на Флорида Рон ДеСантис.
Суарез имаше турбулентен однос и со Трамп и со ДеСантис.
Не го поддржа Трамп, го критикуваше Де Сантис
Тој не го поддржа Трамп во неговата кандидатура за реизбор во 2020 година и беше многу критичен кон некои од политиките на ДеСантис за време на пандемијата КОВИД-19.
На новинарско прашање да го коментира обвинението покренато против Трамп поради злоупотреба на доверливи документи, Суарез одговори дека се надева оти неговата кандидатура може да придонесе за промена на политичкиот дискурс.
„Зборувањето на таа тема не е здраво за нашата држава. Треба да зборуваме за работите за кои се грижат Американците, а не за претседателските кандидати против кои е поднесено обвинението“, рече тој.
За време на неговиот мандат, Мајами имаше корист од доаѓањето на технолошки компании и богати инвеститори во градот, градежништвото напредуваше, што придонесе за имиџот на градот како врвна меѓународна туристичка дестинација.