Голем пожар во департманот Од, на југот на Франција, зафати површина од најмалку 800 хектари, а стотици пожарникари се вклучени во неговото гаснење, додека властите апелираат до населението да биде внимателно и да ја избегнува загрозената област.
Префектот на департманот Од Алан Бука го активираше Оперативниот центар на Департманот и апелираше до граѓаните да бидат внимателни, да не се приближуваат до засегнатата област и да не ги оптоваруваат телефонските линии за итни случаи, објавува Фигаро.
Работата на пожарникарите е отежната од непристапниот, ридест терен без пристапни патишта, поради што беа ангажирани два булдожери за да се обезбеди пристап до загрозените области.
Пожарот избувна вчера околу 16:30 часот во близина на градот Упија, околу 30 километри северно од Нарбон, а потоа брзо се прошири на североисточниот дел од департманот Од во неповолни временски услови, во време кога Франција се подготвува за нов топлотен бран.
На температурите од околу 30 степени им се придружија силни налети на ветер, што го фаворизираше ширењето на пожарот низ ниска и многу сува вегетација и претежно борова шума, која е лесно запалива.
Францускиот премиер Себастијан Лекорни денес треба да отпатува во Марсеј за да претседава со нов меѓуминистерски кризен штаб посветен на топлина, пожари и прилагодување кон вакви екстремни настани.
Околу 550 пожарникари од два оддела, со засилување од одделот Тарн, како и околу 30 припадници на жандармеријата, учествуваат во гаснењето.
На населението му беше советувано да остане во затворен простор, а помеѓу 150 и 200 луѓе беа евакуирани.
Според префектурата, четири авиони Canadar CL-415, два авиони De Havilland Canada Dash 8 и еден противпожарен хеликоптер беа вклучени во гаснењето на пожарот.
Неколку локални патишта беа затворени за сообраќај, додека густ чад можеше да се види на километри наоколу.
Пожарот, прв од ваков обем во Франција оваа година, го оживува сеќавањето на катастрофалниот пожар во масивот во Корбие во август 2025 година, најлошиот на францускиот медитерански брег за половина век, кога пожарот зафати околу 17.000 хектари и изгоре повеќе од 11.000 хектари земјиште југозападно од Нарбон, недалеку од областа сега погодена од пожарот.
Шеесет и петгодишна жена која не успеала да го напушти својот дом на време почина во тој пожар, додека неколку лица беа повредени, јавува Танјуг.