Новиот генерален секретар на НАТО, поранешниот холандски премиер Марк Руте, пред официјално да го започне мандатот, има задача да избере заменик, а меѓу сериозните кандидати во Брисел се споменуваат две жени, поранешни функционери на Македонија и Бугарија.
„Оваа позиција многу веројатно би можела да ѝ припадне на жена од Источна Европа“, изјави за Политико поранешната портпаролка на НАТО, Оана Лунгеску.
Тоа го потврди и висок неименуван функционер на Алијансата, додавајќи дека меѓу сојузниците постои општ консензус дека на таа позиција треба да дојде некој од Источна Европа.
Името за кое многу се зборува е поранешната министерка за одбрана Радмила Шекеринска, вели дипломат на НАТО и висок функционер на Алијансата.
Доколку биде избрана, таа ќе биде највисокиот функционер на НАТО досега од регионот на Западен Балкан, кој не доаѓа од земја членка на ЕУ.
Шекеринска моментално е потпретседател на Партијата на европските социјалисти и одигра клучна улога во приемот на Македонија во НАТО пред четири години.
Во интервјуто по руската инвазија на Украина, таа ги отфрли руските тврдења дека проширувањето на Алијансата на исток е „застрашувачки план на Западот“.
„Напротив, големите членки на НАТО немаа посебен апетит за проширување“, рече тогаш Шекеринска.
Делегациите на Бугарија и Македонија без коментар
Како кандидат за десна рака на Руте се споменува поранешниот вицепремиер на Бугарија и поранешна еврокомесарка Марија Габриел, тврдат двајца добро информирани функционери.
Габриел не сакаше да ги коментира овие наводи.
Делегациите на Бугарија и Македонија не ги коментираа овие можни кандидатури.
Иако двајцата кандидати од Балканот се сметаат за главни фаворити, се споменуваат и некои други имиња, како поранешниот латвиски премиер Кришјанис Каринш, а Полска и Турција размислуваат да предложат свои претставници, тврдат двајца дипломати на НАТО.
Актуелниот заменик на Руте, Мирчеа Џоана, се повлекува за да се кандидира на претседателските избори во Романија во ноември, изјавија претставници на НАТО за Политико.
Руте ја презема функцијата на 2 октомври во време кога Алијансата треба да го зајакне своето источно крило за да спречи каква било потенцијална руска агресија, наведува бриселскиот портал, додавајќи дека затоа е важно длабокото познавање на доктрината на Кремљ при изборот на наследникот на Руте.
Улогата на заменик-генералниот секретар на НАТО добива на значење во последната деценија, забележува Оана Лунгеску.
Носителот на оваа позиција го заменува својот шеф и претседава со состаноци двапати неделно со 32-та амбасадори во Северноатлантскиот совет или на кој било вонреден состанок, вклучувајќи го и Советот НАТО-Украина.