Федералната служба за безбедност на Русија (ФСБ) декласифицираше повеќе од десет документи на НКВД на СССР поврзани со злосторствата на нацистичките сили извршени во Ленинградската и Новгородската област во текот на 1941 и 1942 година.
Како што објави службата на ФСБ за Санкт Петербург и Ленинградската област, документите детално опишуваат бројни случаи на убиства, грабежи, палење села, присилно раселување на населението и суров третман на цивили, како и затворање во концентрациони логори.
Според објавените материјали, масовни злосторства против цивилното население се евидентирани во неколку окупирани области.
Се вели дека кон крајот на ноември 1941 година, во Красноармејск (денешна Гачина) бил формиран логор каде што биле притворени до 1.500 воени заробеници и цивили.
Во документите се споменува и дека телото на 15-годишно девојче кое наводно било мачено и силувано е пронајдено во ќелија на Тихвинскиот манастир, кој бил под окупација на германско-фашистичките сили.
Како дел од декласифицираниот архивски материјал, објавен во збирката „Нацизам. Документарни докази за злосторството“, се споменуваат и податоци за масовните убиства на цивили, вклучувајќи деца и бебиња, на територијата на Старобељска во поранешниот Ворошиловградски регион.
Според тие документи, во областа на аеродромот Старобеље се пронајдени масовни гробници со тела на жени и деца, што дополнително го потврдува обемот на злосторствата извршени за време на Втората светска војна на овие простори.