Францускиот министер за надворешни работи Жан-Ноел Баро денеска оцени дека одлуката на рускиот претседател Владимир Путин за промена на нуклеарната доктрина на земјата е „обична реторика“.
Во интервју за телевизијата Франс 2, Баро истакна дека Франција не е „заплашена“, пренесува Ројтерс.
Во вторникот Путин потпиша указ „за одобрување на основите на државната политика на Руската Федерација во областа на нуклеарното одвраќање“.
Ажурираната доктрина предвидува дека основата за нуклеарен напад може да биде агресија врз Русија и нејзините сојузници од која било ненуклеарна држава со поддршка на нуклеарна држава, како и масовен воздушен напад со ненуклеарни средства, особено беспилотни летала.
Путин најави дека ќе се направат измени во документот уште во септември оваа година, кога Западот првпат почна да ја разгледува можноста за длабоко удар во Русија, пренесува Танјуг.
Откако светските медиуми во неделата објавија дека САД ја овластиле Украина да користи крстосувачки ракети со долг дострел ATACMS за напади длабоко во руска територија, руското Министерство за одбрана претходно денеска објави дека украинските вооружени сили извршиле напад со шест балистички ракети ATACMS во Регионот Брјанск синоќа.