Големиот пожар што избувна во Франција, во магацинот на компанијата „Боло логистик“ во Нормандија, кој содржи илјадници литиумски батерии, сега е „ограничен“, соопштија денеска локалните власти.
Префектурата Сен Маритам објави на Твитер дека пожарот што избувна во понеделникот во 16:30 часот во складиште за литиум во градот Гран Курон во близина на Руан и се прошири во блискиот магацин на компанијата за гуми Districes, е ставен под контрола синоќа на полноќ, јавува Ројтерс.
Во текот на ноќта нов пожар избувнал во третиот магацин на истата локација, сопственост на фирмата Зиглер, каде што се складира текстил, а околу 06:00 часот утринава бил локализиран и овој нов пожар, соопштија надлежните.
Напоменуваат дека во овој инцидент нема жртви или повредени и дека засега не се знае причината за пожарот.
Првите проверки на квалитетот на воздухот што ги извршија пожарникарите покажаа дека нема индикации дека овие пожари предизвикале големо загадување на воздухот и дека во оваа фаза нема посебен ризик, наведува Ројтерс.