Синоќа, Европската Унија повика на целосно почитување на прекинот на огнот на Блискиот Исток и ја повтори својата поддршка за решение со две држави, за време на дебатата за ситуацијата на Блискиот Исток во Советот за безбедност на Обединетите нации во Њујорк.
Во изјавата дадена од шефот на Делегацијата на Европската Унија во Обединетите нации, Ставрос Ламбринидис, ЕУ го поздрави прекинот на огнот меѓу Соединетите Американски Држави и Иран, како и договорот меѓу Израел и Либан, со апел до сите страни да ги прекинат воените операции и да го почитуваат меѓународното право, се вели во соопштението на ЕУ.
Посебно беше нагласена потребата од слобода на пловидба низ Ормутскиот теснец и беше поддржан планот на Меѓународната поморска организација за ослободување на бродовите и морнарите заробени во Персискиот Залив.
ЕУ изрази сериозна загриженост поради влошувањето на ситуацијата во Газа и Западниот Брег, вклучително и Источен Ерусалим, посочувајќи на тешка хуманитарна криза и повикувајќи го Израел да дозволи непречен пристап до помош и работата на хуманитарните организации, вклучително и Агенцијата на ОН за помош и работа за палестинските бегалци на Блискиот Исток (UNRVA).
Во соопштението се осудуваат и едностраните дејствија на Израел на Западниот Брег, кои Меѓународниот суд на правдата ги оцени како нелегални, како и насилството на доселениците врз палестинските цивили.
ЕУ, исто така, најави продолжување на работата за рестриктивни мерки против одговорните актери.
Унијата ја повтори својата посветеност на постигнување траен мир преку решение за две држави, во кое Израел и Палестина би коегзистирале во безбедни и признати граници, со поддршка на меѓународни иницијативи и зајакнување на палестинските институции.
Беше истакната и посветеноста на ЕУ за поддршка на мирна и инклузивна транзиција во Сирија, почитувајќи ги правата на сите граѓани без дискриминација, пренесува Танјуг.