Идната палестинска држава би можела да биде демилитаризирана и да има привремено меѓународно безбедносно присуство, изјави египетскиот претседател Абдел Фатах ел Сиси.
„Рековме дека сме подготвени за демилитаризација на оваа земја и може да има гаранции за силите, без разлика дали тоа се силите на НАТО, силите на Обединетите нации или арапските или американските сили, додека не постигнеме безбедност за двете држави, новосоздадената палестинска држава и израелската држава“, рече ел-Сиси во петокот за време на заедничката прес-конференција во Каиро со шпанскиот премиер Педро Санчез и белгискиот премиер Александар Де Кро.
Политичката резолуција со која се повикува на палестинска држава заснована на границите од 4 јуни 1967 година, со источен Ерусалим како главен град, остана недостижна, додаде ел Сиси.
Арапските земји ги отфрлија сугестиите дека арапските сили би можеле да обезбедат безбедност во Појасот Газа по завршувањето на сегашната воена операција на Израел против палестинската група Хамас, која владее со Газа од 2007 година.
Јорданскиот министер за надворешни работи Ајман Сафади им изјави на новинарите во Лондон оваа недела дека арапските земји не би сакале да одат во Појасот Газа, кој може да се претвори во „пустина“ со израелска воена офанзива.
„Кои се околностите под кои секој од нас би сакал да оди и да биде сфатен како непријател и да се види дека дошол да го исчисти израелскиот хаос?“, рече тој.