Воените лидери на западноафриканските земји денеска ќе се сретнат во Акра, главниот град на Гана, за да разговараат за можна воена интервенција во Нигер доколку дипломатијата не успее да ги смени ефектите од воениот удар во Нигер.
Членовите на претседателската гарда на Нигер, предводени од генералот Абдурахман Тиани, кој ја презеде власта минатиот месец, наидоа на остри осуди од светските сили и земјите-членки на Економската заедница на западноафриканските држави (ECOWAS), кои минатата недела одлучија да ги мобилизираат своите резервни воени сили.
Состанокот на воените команданти на западноафриканските земји ќе започне во Генералштабот на вооружените сили на Гана денеска околу 11 часот по средноевропско време и ќе трае до петок попладне, јавува Ројтерс.
Воената хунта на Нигер соопшти дека е отворена за разговори за решавање на кризата, но сè уште го држи соборениот претседател Мохамед Базум во притвор, најавувајќи дека ќе биде обвинет за велепредавство.